Azərbaycan Tibb Universitetinin (ATU) Patologiya kafedrasının müəllimi, tibb üzrə fəlsəfə doktoru Arzu İbişova Çinin Çenqde Tibb Universitetində (Chengde Medical University) keçirilən beynəlxalq tibbi təlim proqramında iştirak edib.
ATU-dan Aztibb.az-a verilən məlumata görə, təlim çərçivəsində Arzu İbişova sözügedən universitetin Patologiya üzrə Tədris və Elmi-Tədqiqat Ofisinin direktoru Vey Yanczie ilə görüşüb. Görüş zamanı universitetin və klinikanın müxtəlif şöbələri, eləcə də Patologiya Mərkəzinin fəaliyyəti ilə tanışlıq olub.
Görüşdə patologiya sahəsində müasir diaqnostik yanaşmalar, tədris metodları və elmi-tədqiqat istiqamətləri üzrə fikir və təcrübə mübadiləsi aparılıb. ATU əməkdaşı müasir tibb elminin inkişafında beynəlxalq əməkdaşlığın və qabaqcıl təcrübələrin paylaşılmasının əhəmiyyətini vurğulayıb.
Beynəlxalq proqram çərçivəsində A.İbişova müxtəlif tibbi və akademik istiqamətlər üzrə mütəxəssislərlə görüşlərdə iştirak edərək, müasir yanaşmalarla tanış olub, eyni zamanda ATU-nun tədris və elmi-tədqiqat fəaliyyəti ilə bağlı təcrübəsini bölüşüb.
Çenqde Tibb Universitetində keçirilən təlim ATU əməkdaşının beynəlxalq peşəkar əlaqələrinin genişləndirilməsi, yeni tibbi yanaşmaların öyrənilməsi və patologiya sahəsində təcrübə mübadiləsinin inkişafı baxımından əhəmiyyətli olub.
