Azərbaycan Respublikası Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzi ilə Belarus Respublikasının Minsk Cərrahiyyə, Transplantasiya və Hematologiya Elmi-Praktiki Mərkəzi arasında orqan donorluğu və transplantasiya sahəsində ikitərəfli əməkdaşlığa dair Anlaşma Memorandumu imzalanıb.
Bu barədə Aztibb.az-a Səhiyyə Nazirliyindən məlumat verilib.
Sənədi Azərbaycan Respublikası Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova və Belarus Respublikasının Minsk Cərrahiyyə, Transplantasiya və Hematologiya Elmi-Praktiki Mərkəzinin direktoru, Belarus Respublikası Milli Assambleyası Respublika Şurasının üzvü (senator) Oleq Rummo imzalayıblar.
Memorandum orqan donorluğu və transplantasiya sahəsində təcrübə və məlumat mübadiləsinin aparılmasını, mütəxəssislər arasında əməkdaşlığın inkişaf etdirilməsini, qarşılıqlı səfərlərin və peşəkar inkişafın dəstəklənməsini, elmi-praktik əlaqələrin genişləndirilməsini və digər qarşılıqlı maraq doğuran istiqamətlər üzrə əməkdaşlığı nəzərdə tutur.
Memorandumun imzalanması Azərbaycan və Belarus arasında orqan donorluğu və transplantasiya sahəsində əməkdaşlığın daha da gücləndirilməsi istiqamətində mühüm addımdır.
