"İstedadlı Əlillər" İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Əlilliyi olan şəxslər üçün mədəni turların təşkili" layihəsi çərçivəsində Qubada növbəti tədbir keçirilib.

Aztibb.az-a Agentlikdən verilən xəbərə görə, qonaqlar Qubanın tarixi və mədəni məkanları ilə tanış olublar. Tədbir iştirakçıları həmçinin Quba Soyqırımı Memorial Kompleksini ziyarət ediblər. Ziyarətçilərə 1918-ci il hadisələri və kompleksin fəaliyyəti haqqında ətraflı məlumat verilib. Bildirilib ki, 2007-ci ildə Quba şəhərində tikinti məqsədilə aparılan qazıntılar zamanı təsadüfən aşkar edilmiş kütləvi məzarlıq 1918-ci ilin may ayında bolşevik adı altında quldur erməni dəstələri tərəfindən törədilmiş Qubanın müsəlman əhalisinin soyqırımının əyani sübutudur.  Həmin ərazidə 2013-cü il sentyabrın 18-də Heydər Əliyev Fondunun dəstəyi ilə  Quba Soyqırımı Memorial Kompleksinin açılışı olub. 

Turun sonunda keçirilən konsert proqramına qatılan  qonaqlar onlara göstərilən diqqətə görə əlaqədar təşkilatlara təşəkkürlərini bildiriblər.   

Qeyd edək ki, tədbirin əsas məqsədi əlilliyi olan şəxslərin sosial və mədəni həyata fəal inteqrasiyasına dəstək olmaq, onların asudə vaxtlarının səmərəli təşkilini təmin etmək, yaradıcılıq və bacarıqlarını nümayiş etdirmələri üçün imkan yaratmaq, eləcə də inklüzivliyin cəmiyyətdə təşviqinə töhfə verməkdir.