Azərbaycan Tibb Universitetinin (ATU) Qulaq, burun və boğaz xəstəlikləri kafedrasının müdiri, professor Vəfa Pənahianın 60 illik yubileyinə həsr olunmuş tədbir keçirilib.
Bu məlumat Aztibb.az-a ATU-dan verilib.
Bildirilib ki, ATU-nun Tədris Cərrahiyyə Klinikasında baş tutan tədbirdə əvvəlcə professor Vəfa Pənahianın həyat və fəaliyyətindən bəhs edən videoçarx nümayiş etdirilib.
Daha sonra Ağız və üz-çənə cərrahiyyəsi kafedrasının müdiri, professor Çingiz Rəhimov çıxışında yubilyarın uzun illər ərzində tədris, elmi, metodiki və təşkilati fəaliyyəti, həkim və elmi-pedaqoji kadrların hazırlanmasına verdiyi töhfələrdən danışıb. O, professor Vəfa Pənahianın yüksək peşəkarlığı və insani keyfiyyətləri ilə həmkarları və tələbələri arasında böyük hörmət qazandığını vurğulayıb.
Professor Çingiz Rəhimov Vəfa Pənahianın II Qarabağ müharibəsi dövründə göstərdiyi xidmətlərə də toxunub. Bildirib ki, pandemiya səbəbindən fəaliyyətinə fasilə verilən klinikanın işinin bərpasından sonra cəbhə bölgəsindən gətirilən ağır yaralıların müalicəsində Vəfa Pənahian da fəal iştirak edib, mürəkkəb əməliyyatların icrasında həmkarları ilə birlikdə çalışıb. O, yubilyarın qazilərə yüksək səviyyəli tibbi xidmət göstərdiyini və müharibə dövründə xüsusi fədakarlıq nümayiş etdirdiyini qeyd edib.
Uzun illər Qulaq, burun və boğaz xəstəlikləri kafedrasına rəhbərlik etmiş professor Əzizağa Talışınskiy də yubilyarı təbrik edərək, onun kafedranın ənənələrinin layiqli davamçısı olduğunu bildirib.
Tədbirdə Stomatologiya fakültəsinin dekanı, dosent Elmira Əliyeva, professorlar Xaləddin Musayev, Azər Xudiyev, Ramidə Şadlinskaya, Zemfira Məmmədova, Ağa Paşayev, Paşa Musayev (Qəlbinur), Ramiz Poluxov, Elçin Əhmədov, dosentlər Rəşad Talişinskiy, Cabbar Cəlilov, Ayaz Qasımov, Ramiz Əhmədbəyli və digər həmkarlar çıxış edərək, professor Vəfa Pənahianı yubileyi münasibəti ilə təbrik edib, ona möhkəm cansağlığı və elmi-pedaqoji fəaliyyətində yeni uğurlar arzulayıblar.
Sonda yubilyar göstərilən diqqət və xoş arzulara görə tədbirin təşkilatçılarına və iştirakçılara minnətdarlığını bildirib.
