Azərbaycan Respublikası Vəkillər Kollegiyasının üzvü Hikmət Babayev Belçikanın Antverpen Universitetində keçirilən Dünya Tibb Hüququ Assosiasiyasının 30-cu Konqresində iştirak edib.

Aztibb.az-ın məlumatına görə, Hikmət Babayev konqres çərçivəsində “İnsan dölünün (embrionun) hüquqları” və “Həkim səhvləri və tibbi riskləri arasındakı sərhəd” mövzularında təqdimatlar edib. Bundan əlavə, Hikmət Babayev Dünya Tibb Hüququ Assosiasiyasının Tibbi Cinayət Hüququ Komitəsinin daimi üzvlüyünə qəbul edilib.

Qeyd edək ki, Vəkillər Kollegiyasının üzvü, tibb hüququ üzrə ekspert və alim Hikmət Babayev Bakı Dövlət Universitetinin Hüquq fakültəsinin Mülki proses və kommersiya hüququ kafedrasında müəllim kimi fəaliyyət göstərir. O, eyni zamanda, tibb hüququ sahəsində elmi və praktiki fəaliyyətlə məşğul olur və Səhiyyə Nazirliyi yanında Antidopinq Apellyasiya Komitəsinin üzvüdür.

Hikmət Babayevin tibb hüququ üzrə yerli və beynəlxalq jurnallarda 10-dan artıq elmi məqaləsi dərc olunub. Həmçinin müxtəlif beynəlxalq elmi konfranslarda tibb hüququnun aktual məsələlərinə dair məruzələrlə çıxış edib.