Sumqayıt Tibb Mərkəzinin (STM) nəzdində fəaliyyət göstərən Perinatal Mərkəzdə “Nekrotizan enterokolit” mövzusunda seminar keçirilib.

STM-dən Aztibb.az-a verilən xəbərə görə, seminarı Perinatal Mərkəzin uzman uşaq cərrahı Araz Hüseynov aparıb. Tədbirdə cərrahlar və neonatoloqlar iştirak ediblər.

Seminar zamanı yenidoğulmuşlarda, xüsusilə vaxtından əvvəl doğulan körpələrdə rast gəlinən nekrotizan enterokolit xəstəliyi, onun yaranma səbəbləri, əsas klinik əlamətləri, erkən diaqnostikası və müalicə prinsipləri barədə ətraflı məlumat verilib. Həmçinin xəstəliyin ağırlaşma riskləri və cərrahi müdaxiləyə ehtiyac yaradan hallar diqqətə çatdırılıb.

Mövzu ətrafında fikir mübadiləsi aparılıb, iştirakçıların sualları cavablandırılıb. Seminarın keçirilməsində əsas məqsəd həkimlərin bu istiqamətdə bilik və praktiki bacarıqlarının artırılması, xüsusilə yenidoğulmuşlarda xəstəliyin erkən aşkarlanması və düzgün müalicə taktikasının müəyyənləşdirilməsinə dəstək olmaqdır.