Xroniki böyrək çatışmazlığından əziyyət çəkən pasiyent bacısının fədakarlığı sayəsində yenidən sağlam həyatına qovuşub.

Aztibb.az xəbər verir ki, əməliyyatı icra edən ümumi cərrah, transplantoloq Tariyel Nadirovun sözlərinə görə, xəstəliyin son mərhələsində olan pasiyentə bacısı könüllü olaraq donorluq etmək qərarına gəlib:

 

"Uzun müddət xroniki böyrək çatışmazlığı ilə mübarizə aparan xəstəmizin vəziyyəti son mərhələyə çatdıqda, bacısı heç bir tərəddüd etmədən ona donor olmaq istədi. Təxminən 5 gün əvvəl həyata keçirdiyimiz böyrək köçürülməsi əməliyyatı tam uğurla yekunlaşdı. Sevindirici haldır ki, köçürülən böyrək elə əməliyyat masasındaykən dərhal fəaliyyətə başladı".

Həkim əməliyyatdan sonrakı bərpa prosesinin də qüsursuz keçdiyini qeyd edib: "Donor olan bacının vəziyyəti tam qənaətbəxş olduğu üçün əməliyyatın 3-cü günündə artıq onu evə yazdıq".

Bu uğurlu transplantasiya orqan donorluğunun insan həyatını xilas etmədə nə dərəcədə mühüm rol oynadığını bir daha nümayiş etdirir.