Sony şirkəti iynə ilə qarğıdalı dənələrini bir-birinə tikə bilən robot sistemi hazırlayıb. Bu nümayiş sadəcə texnoloji nümayiş deyil, sistemin cərrahiyyə zamanı diametri 1 millimetrdən də kiçik olan qan damarları və sinirlər üzərində necə dəqiq işləyə biləcəyini göstərir.

Aztibb.az "Hi-tech" portalına istinadən yazır ki, robot cərrah bütün prosesi konsol qarşısında idarə edir, 4K stereoskopik görüntünü izləyir və robot onun əl hərəkətlərini daha kiçik miqyasda dəqiq şəkildə təkrarlayaraq əllərdəki titrəmələri aradan qaldırır.Sistem həmçinin cərrahi alətləri təxminən 10 saniyə ərzində avtomatik dəyişə bilir.

Aichi Tibb Universitetində aparılan sınaqlarda mikro-cərrahiyyə üzrə ixtisaslaşmamış həkimlər bu sistemin köməyi ilə diametri cəmi 0,6 millimetr olan heyvan damarlarını uğurla tikiblər.

Sony şirkəti bu texnologiya ilə mikro-cərrahiyyəni yalnız uzun illər təcrübəsi olan azsaylı mütəxəssislərin bacarığı olmaqdan çıxarıb daha çox cərrah üçün əlçatan etməyi hədəfləyir.