ABŞ-ın Şimal-Qərb Universitetinin tədqiqatçıları hazırladığı düyü dənəsindən də kiçik ölçüdə olan və funksiyasını tamamladıqdan sonra orqanizmdə tamamilə əriyərək yox olan simsiz müvəqqəti ürək stimulyatoru ilə bağlı araşdırmaları genişləndirirlər.

Aztibb.az "Nature" jurnalına istinadən yazır ki, cihaz ürək əməliyyatından sonra müvəqqəti dəstəyə ehtiyacı olan və ya daimi kardiostimulyator gözləyən xəstələr üçün nəzərdə tutulub. Ənənəvi müvəqqəti ürək stimulyatorlarından fərqli olaraq, yeni texnologiya əlavə cərrahi müdaxiləyə və bədəndən kənara çıxan naqillərə ehtiyac olmadan işləyə bilir.

Cihazın əsas üstünlüklərindən biri də müəyyən müddətdən sonra bədən mayelərində bioloji olaraq parçalanaraq heç bir tibbi tullantı buraxmadan yox olmasıdır. Bu xüsusiyyət infeksiya və əlavə müdaxilə riskini azaltmaqla, xüsusilə yeni doğulmuş körpələr və əməliyyatdan sonrakı dövrdə olan xəstələr üçün daha təhlükəsiz müalicə imkanı yarada bilər.

Texnologiyanın gələcəkdə müvəqqəti ürək stimulyasiyasına ehtiyac olan xəstələrin müalicəsində yeni yanaşmanın əsasını qoyacağı gözlənilir.