Amerikanın Moderna şirkətinin səhmləri melanoma qarşı fərdiləşdirilmiş mRNT terapiyasının III faza klinik sınaqlarının uğurlu nəticələrindən sonra çərşənbə günü təxminən 160 faiz bahalaşıb. Şirkətin səhmlərinin qiyməti gün ərzində təxminən 163 dollara yüksəlsə də, sonradan artımın bir hissəsi geri çəkilib.

Aztibb.az "Life" portalına istinadən yazır ki, Moderna tərəfindən Merck şirkəti ilə birgə hazırlanan intismeran autogene preparatı immunoterapiyada istifadə olunan Keytruda ilə birlikdə sınaqdan keçirilib. Tədqiqatın əsas məqsədinə nail olunub. Melanoması tam cərrahi yolla çıxarılan pasiyentlərdə bu kombinasiya yalnız Keytruda ilə müqayisədə xəstəliyin təkrarlanmadığı müddəti statistik baxımdan əhəmiyyətli dərəcədə artırıb.

Bundan əlavə, mühüm ikinci nəticə də əldə olunub: uzaq metastazların yaranmadığı müddət yaxşılaşıb. Bununla belə, şirkətlər III faza sınaqlarının effektivliyinə dair dəqiq göstəriciləri hələ açıqlamayıb. Tam nəticələrin beynəlxalq tibbi konfransda təqdim edilməsi və tənzimləyici qurumlara göndərilməsi planlaşdırılır.

Klinik sınaqda dərisi tamamilə çıxarılmış və xəstəliyin geri qayıtma riski yüksək olan IIB–IV mərhələli melanoma diaqnozu qoyulmuş 1137 pasiyent iştirak edib. Onlar təsadüfi qaydada iki qrupa bölünüb: bir qrup intismeran autogene və Keytruda, digər qrup isə yalnız Keytruda qəbul edib. Aralıq təhlil zamanı yeni təhlükəsizlik siqnalları aşkarlanmayıb.

İntismeran autogene hər pasiyent üçün fərdi şəkildə hazırlanır. Bunun üçün şiş nümunəsi analiz edilərək ona xas mutasiyalar müəyyənləşdirilir. Daha sonra immun sisteminə xərçəng hüceyrələrini tanımağı öyrətmək məqsədi daşıyan fərdiləşdirilmiş mRNT terapiyası hazırlanır.

Şirkətin məlumatına görə, bunlar mRNT əsaslı fərdiləşdirilmiş neoantigen terapiyasının III faza klinik sınağında əldə edilən ilk müsbət nəticələrdir.