Fərdiləşdirilmiş mRNT peyvəndi mədəaltı vəzi (pankreas) xərçənginin müalicəsində mühüm irəliləyiş vəd edir. Klinik sınaqlar göstərib ki, bu peyvənd uzunmüddətli immun cavab formalaşdıraraq xəstəliyin yenidən qayıtma riskini əhəmiyyətli dərəcədə azalda bilər.

Aztibb.az "Nature" jurnalına istinadən yazır ki, uzun illərdir mədəaltı vəzi xərçəngi ən aqressiv və müalicəsi ən çətin onkoloji xəstəliklərdən biri hesab olunur. Hətta şiş uğurla cərrahi yolla çıxarıldıqdan sonra belə, xəstəliyin təkrarlanma ehtimalı yüksək olaraq qalır.

Memorial Sloan Kettering Xərçəng Mərkəzinin alimlərinin rəhbərliyi ilə həyata keçirilən I faza klinik tədqiqatda autogene cevumeran adlı fərdiləşdirilmiş mRNT peyvəndinin effektivliyi qiymətləndirilib. Peyvənd hər bir xəstənin şişindən götürülən nümunənin genetik analizinə əsaslanaraq hazırlanır. Şişdəki spesifik mutasiyalar müəyyən edilir və onların əsasında fərdi mRNT hazırlanır. Bu isə orqanizmdə xərçəng hüceyrələrini tanıyıb məhv edən T-limfositlərin yaranmasını stimullaşdırır.

Tədqiqatın nəticələri ümidverici olub. Peyvənd iştirakçıların təxminən yarısında güclü və uzunmüddətli immun cavab yaradıb.

2026-cı ildə təqdim olunan uzunmüddətli müşahidə nəticələrinə görə, immun cavab inkişaf etdirən xəstələrdə xərçəngin yenidən yaranma riski əhəmiyyətli dərəcədə aşağı olub. Bu qrupa daxil olan xəstələrin təxminən 90 faizi müalicədən sonra altı ilə qədər sağ qalıb.

Mütəxəssislər hesab edirlər ki, bu nəticələr mədəaltı vəzi xərçənginin müalicəsində fərdiləşdirilmiş immunoterapiya yanaşmasının böyük potensiala malik olduğunu göstərir. Hazırda bu yanaşmanın effektivliyini təsdiqləmək məqsədilə daha genişmiqyaslı klinik tədqiqatların aparılması planlaşdırılır.