Seçenov Universitetinin alimləri qızılca epidemiyasını modelləşdirməyə və müxtəlif peyvənd sxemlərinin uzunmüddətli effektivliyini qiymətləndirməyə imkan verən agent-əsaslı model hazırlayıblar.

Aztibb.az TASS agentliyinə istinadən yazır ki, model demoqrafik və miqrasiya proseslərini, yaş qrupları üzrə təmasları, ana və peyvənddən sonrakı immuniteti nəzərə alır. Alimlərin fikrincə, bu yanaşma mövcud modellərlə müqayisədə epidemiyanın yayılmasını daha dəqiq proqnozlaşdırmağa imkan verir.

Tədqiqat çərçivəsində üç peyvənd sxemi müqayisə olunub. Nəticələr göstərib ki, ilk dozanın 12 ay əvəzinə 9 aylığında vurulması ən effektiv variantdır. Bu sxem standart peyvənd təqvimi ilə müqayisədə uzunmüddətli xəstələnməni 2,5 dəfə, epidemiya piklərini isə 2 dəfə azaldıb. Əlavə olaraq, 18 yaşda tətbiq edilən buster doza isə əhəmiyyətli üstünlük göstərməyib.

Tədqiqat müəllifləri hesab edirlər ki, bu model gələcəkdə qızılca ilə mübarizədə daha effektiv peyvənd strategiyalarının hazırlanmasına kömək edə bilər.