Azərbaycan Tibb Universitetinin (ATU) yaşlı şəxslərdə sensorinevral eşitmə itkisi ilə bağlı apardığı elmi tədqiqat Niderland Krallığında keçirilən beynəlxalq elmi konfransda təqdim olunub.
Universitetdən Aztibb.az-a bildirilib ki, ATU-nun “İctimai sağlamlıq və səhiyyənin təşkili” kafedrasının assistenti, doktorant Samirə Mirhadi Amsterdam şəhərində keçirilən qlobal tədbirdə “Yaşla əlaqədar sensorinevral eşitmə itkisində lateralizasiya” mövzusunda məruzə ilə çıxış edib.
Tədqiqat yaşlı şəxslərdə sensorinevral eşitmə itkisinin sağ, sol və ikitərəfli rastgəlmə xüsusiyyətlərini, eləcə də eşitmə itkisinin lateralizasiyası ilə dominant əl arasında mümkün əlaqəni araşdırıb.
Bakı şəhərində fəaliyyət göstərən bir gerontoloji mərkəz və üç ambulator poliklinikanın tibbi sənədləri əsasında aparılan araşdırmanın nəticələri yaşla əlaqədar sensorinevral eşitmə itkisində müəyyən lateralizasiya xüsusiyyətlərinin olduğunu göstərib.
Araşdırmaya əsasən, sağtərəfli eşitmə itkisinə daha çox rast gəlindiyi, eşitmə itkisinin ağırlıq dərəcəsinin yaş artdıqca yüksəldiyi, həmçinin eşitmə itkisinin tərəfi ilə dominant əl arasında nəzərəçarpan əlaqənin olduğu müəyyənləşdirilib.
Tədqiqatın digər mühüm nəticəsi yaşlı şəxslər arasında eşitmə itkisinin profilaktikası və erkən aşkarlanması ilə bağlı məlumatlılığın artırılmasının vacibliyidir. Eşitmə qabiliyyətinin qorunması yaşlı insanların yalnız fiziki sağlamlığı deyil, həm də ünsiyyət imkanları, sosial fəallığı və həyat keyfiyyəti baxımından mühüm əhəmiyyət daşıyır.
Bu istiqamət BMT-nin Dayanıqlı İnkişaf Məqsədləri, xüsusilə DİM 3 – “Sağlamlıq və rifah” məqsədi ilə səsləşir. Yaşlı əhali arasında eşitmə problemlərinin erkən aşkarlanması, profilaktik maarifləndirmənin gücləndirilməsi və vaxtında tibbi müdaxilənin təmin olunması sağlam və fəal yaşlanmanın dəstəklənməsinə xidmət edir.
Eyni zamanda, eşitmə məhdudiyyətlərinin erkən müəyyənləşdirilməsi və müvafiq səhiyyə xidmətlərinə çıxışın yaxşılaşdırılması yaşlı insanların sosial həyatda daha fəal iştirakına imkan yaratmaqla DİM 10 – “Bərabərsizliyin azaldılması” istiqamətinə də töhfə verir.
Əldə olunan nəticələr yaşla əlaqədar sensorinevral eşitmə itkisinin epidemioloji xüsusiyyətlərinin daha dərindən öyrənilməsi, risk qruplarının müəyyənləşdirilməsi və yaşlı əhali üçün daha hədəfli profilaktik yanaşmaların hazırlanması baxımından elmi və praktiki əhəmiyyət daşıyır.
ATU əməkdaşının tədqiqatının beynəlxalq elmi platformada təqdim olunması universitetdə ictimai səhiyyə və yaşlı əhalinin sağlamlığı ilə bağlı aktual problemlərin araşdırılmasına, əldə olunan elmi nəticələrin beynəlxalq elmi mühitdə paylaşılmasına və səhiyyədə dayanıqlı yanaşmaların təşviqinə verilən önəmi nümayiş etdirir.
