Ürək-damar xəstəlikləri müasir dövrdə bütün dünyada olduğu kimi. Azərbaycanda da ölüm və əlilliyin əsas səbəblərindən biri olaraq qalır. Demoqrafik dəyişikliklər, əhalinin yaşlanması, urbanizasiya, oturaq həyat tərzi, qeyri-sağlam qidalanma, stress, piylənmə, şəkərli diabet və arterial hipertenziyanın geniş yayılması nəticəsində ürək-damar patologiyalarının tezliyi ildən-ilə artmaqdadır.

Aztibb.az xəbər verir ki, Azərbaycan Tibb Universitetində (ATU) həyata keçirilən Kardiologiya rezidentura ixtisası beynəlxalq tibbi təhsil standartlarına uyğun hazırlanmış müasir tədris proqramıdır. Proqramın məqsədi nəzəri biliklərlə yanaşı klinik düşüncə, praktik bacarıq və elmi fəaliyyət vərdişlərinə malik yüksək ixtisaslı kardioloqlar hazırlamaqdır.
Müasir kardiologiya erkən profilaktika, risk faktorlarının qiymətləndirilməsi, sübuta əsaslanan müalicə, invaziv müdaxilələr, ürək çatışmazlığı və ritm pozğunluqlarının idarə olunmasını əhatə edən geniş tibbi sahədir.

Rezidentlər elektrokardioqrafiya, exokardioqrafiya, Holter monitorinqi, stress-testlər, koronar angioqrafiya, intensiv terapiya və təcili kardioloji yardım üzrə praktik bacarıqlar əldə edirlər.
Elmi-tədqiqat fəaliyyəti proqramın ayrılmaz hissəsidir. Rezidentlər statistik analiz, elmi məqalələrin hazırlanması, beynəlxalq klinik tövsiyələrin öyrənilməsi və konfranslarda iştirak imkanları qazanırlar.
“Böyük Qayıdış” proqramı çərçivəsində yeni səhiyyə müəssisələrinin yaradılması peşəkar kardioloqlara tələbatı daha da artırır. Məzunlar dövlət və özəl xəstəxanalarda, invaziv mərkəzlərdə, universitetlərdə və elmi-tədqiqat institutlarında fəaliyyət göstərə bilərlər.
Kardiologiya insan həyatını xilas edən, yüksək məsuliyyət və davamlı peşəkar inkişaf tələb edən strateji ixtisasdır.