Azərbaycan Tibb Universitetində (ATU) gələcəyin həkimləri üçün praktiki təcrübə platforması rolunu oynayan “Rezident həyatı yaşa-5” layihəsi uğurla başa çatıb.

Universitetdən Aztibb.az-a verilən məlumata görə, tələbələrin klinik vərdiş ilə peşə yoluna daha hazırlıqlı addımlamasına xidmət edən layihədə ATU-nun I və II Müalicə-profilaktika fakültələrinin III, IV və V kurs tələbələri iştirak ediblər. 

Tibbi təhsil prosesində əldə edilən nəzəri biliklərin praktik fəaliyyətlə tamamlamasına imkan yaradan layihə bu il də böyük maraqla qarşılanıb. Layihə iştirakçıları müxtəlif tibb müəssisələrində real klinik mühitlə tanış olub, həkim və rezidentlərin gündəlik fəaliyyətini izləyərək gələcək peşə istiqamətləri barədə daha dolğun təsəvvür əldə ediblər.

Ümumilikdə 110 tələbənin qatıldığı layihənin həyata keçirilməsinə ATU Tədris Cərrahiyyə Klinikası, ATU Onkoloji Klinikası, Modern Hospital, Avropa Beynəlxalq Hospital və Respublika Dəri-Zöhrəvi Mərkəzi dəstək göstərib. 

Bu müəssisələrdə müxtəlif şöbələrin fəaliyyətini yaxından izləyən iştirakçılar klinik yanaşmaları öyrənib və həkimlik fəaliyyətinin məsuliyyətlərini müşahidə etmək imkanı qazanıblar.

Praktik məşğələlər 17 ixtisas istiqamətini əhatə edib. Tələbələr neyrocərrahiyyə, kardiocərrahiyyə, radiologiya, urologiya, mamalıq və ginekologiya, oftalmologiya, pediatriya, anesteziologiya və reanimatologiya, qastroenterologiya, kardiologiya, nevrologiya, dermatovenerologiya, ümumi cərrahiyyə, endokrinologiya, onkoginekologiya, təcili tibbi yardım və plastik-rekonstruktiv cərrahiyyə sahələrində praktiki təcrübələr əldə ediblər.

Artıq ənənəvi xarakter daşıyan “Rezident həyatı yaşa” layihəsi tələbələrin gələcək həkimlik fəaliyyətinə daha hazırlıqlı başlamasına, klinik düşüncə və praktiki vərdişlərinin formalaşmasına mühüm töhfə verir. 

Layihə tələbələrin müxtəlif ixtisasların xüsusiyyətlərini yaxından tanımaqla, yalnız tibbi biliklərini deyil, həm də real klinik mühitdə qərarvermə, komanda işi və peşə məsuliyyəti bacarıqlarını inkişaf etdirmələrinə imkan yaradıb. 

Qeyd edək ki, tələbələrin böyük marağına səbəb olan “Rezident həyatı yaşa” layihəsinin müəllifi ATU-nun I Müalicə-profilaktika fakültəsinin dekanı, dosent Elşad Novruzovdur