İnsan həyatına ciddi təhlükə yaradan və çox vaxt daimi əlilliklə nəticələnən insultun (beyin qan dövranının kəskin pozulması) müalicəsi istiqamətində mühüm elmi nailiyyət əldə olunub. Alimlər insult keçirən xəstələrdə beyin toxumasını qorumağa və zədələnmənin bərpasını dəstəkləməyə kömək edə biləcək eksperimental venadaxili (IV) müalicə üsulu hazırlayıblar.

Aztibb.az "Labmedya" nəşrinə istinadən yazır ki, yeni metodun laboratoriya şəraitində siçanlar üzərində aparılan ilkin sınaqları ümidverici nəticələr göstərib. Tədqiqatçılar hesab edirlər ki, bu yanaşma gələcəkdə insult zamanı beyin hüceyrələrinin qorunması ilə bağlı müalicə strategiyalarında mühüm dəyişikliklərə səbəb ola bilər.

Araşdırmanın əsasını "hərəkətli molekullar" (dancing molecules) adlandırılan xüsusi molekulyar strukturlar təşkil edir. Bu molekullar insultdan sonra beyində qan dövranı bərpa edildikdə yaranan ikincili zədələnmələrin qarşısını almağa yönəlib. Müalicə üsulu beyin toxumasında iltihab reaksiyasını sürətlə azaltmaqla hüceyrə ölümünü məhdudlaşdırır və sinir toxumasının zədələnməsini minimuma endirməyə çalışır.

Bundan əlavə, yeni texnologiyanın sinir hüceyrələri arasında əlaqələrin yenidən formalaşmasını stimullaşdırdığı və beynin təbii bərpa mexanizmlərini gücləndirdiyi bildirilir. Bu isə insultdan sonra hərəkət, nitq və digər nevroloji funksiyaların bərpasına müsbət təsir göstərə bilər.

Hazırda bu müalicə üsulu yalnız laboratoriya və heyvan sınaqları mərhələsindədir və insanlar üzərində klinik tədqiqatlara hələ başlanılmayıb. Bununla belə, alimlər qeyd edirlər ki, gələcək klinik sınaqlar uğurlu olarsa, yeni müalicə metodu insultdan sonra yaranan uzunmüddətli əlilliyin qarşısının alınmasında və xəstələrin normal həyata qayıtma şansının artırılmasında mühüm rol oynaya bilər.