Sağlamlığımda yaranmış problemlərlə bağlı davamlı olaraq Bilgəh Kardioloji Sanatoriyasına müalicəyə gedirəm və sağlamlığımın bərpasında yaxşılığa doğru xeyli dəyişikliklər hiss edirəm. Burada çalışan həkimlər, tibb bacıları bizi diqqətlə dinləyir və qayğımıza qalırlar, lazımi məsləhətlər verirlər. 

Müalicələr zamanı hiss etdim ki, xəstəliyə yalnız dərmanlar deyil, həm də burada çalışan həkimlərin, tibb bacılarının diqqət və qayğısı da müsbət təsir göstərir. Gördüyümüz xoş münasibət sağlamlığımızın bərpasını xeyli sürətləndirir. 

Bu günlər yenə sanatoriyaya müalicəyə getmişdim. Elə ilk gündən burada aparılmış təmir-bərpa və abadlıq işləri, müalicə otaqlarında yaradılmış şərait, quraşdırılmış müasir avadanlıqlar diqqətimizi cəlb etdi. Artıq tətbiq edilən yeni sistem nəticəsində prosedur növbələri də nizamlanır ki, bu da ilk növbədə vaxt itkisinin qarşısını alır.

Tibb ocağında müalicə olunanların asudə vaxtının təşkili də rəhbərliyin diqqət mərkəzindədir. Mütəmadi olaraq sanatoriyada konsertlər təşkil olunur. Açıq havada quraşdırılmış idman qurğuları, tennis və futbol meydançaları isə günün bütün vaxtlarında xəstələrin ixtiyarındadır. 

Bir sözlə, sanatoriyada müalicə almaq, istirahət etmək daha rahatdır. Bütün bunlara görə Bilgəh Kardioloji Sanatoriyasının rəhbərliyinə minnətdarlığımı bildirirəm. 

"Azərbaycan" qəzeti