Naftalanda Dövlət Turizm Agentliyinin təşkilatçılığı, şəhər icra hakimiyyətinin dəstəyi ilə Sağlamlıq Turizmi üzrə İşçi Qrupunun növbəti yığıncağı keçirilib.
Aztibb.az xəbər verir ki, tədbirdən əvvəl Naftalan şəhərində fəaliyyət göstərən sağlamlıq turizmi müəssisələrinə baxış olub. İştirakçılara Naftalan Turizm İnformasiya Mərkəzində şəhərdə turistlərin məlumatlandırılması istiqamətində həyata keçirilən işlər barədə məlumat verilib.
Sonra Naftalandakı neft quyularına infotur təşkil edilib, iştirakçılar unikal müalicəvi xüsusiyyətlərə malik Naftalan neftinin hasilatı prosesi ilə yerində tanış olublar. Naftalan şəhərində fəaliyyət göstərən sağlamlıq turizmi müəssisələrinə baxış təşkil edilib. İştirakçılara müəssisələrin fəaliyyəti, müalicə və reabilitasiya xidmətləri, eləcə də yerləşdirmə infrastrukturu barədə ətraflı məlumat verilib.
Tədbir çərçivəsində keçirilən geniştərkibli yığıncaqda sağlamlıq turizminin inkişafı istiqamətində aktual məsələlər müzakirə edilib. Müzakirə zamanı Naftalanda sağlamlıq turizminin mövcud vəziyyəti və inkişaf perspektivləri, sanatoriya-kurort müəssisələrinin fəaliyyəti, xidmət keyfiyyətinin artırılması və kadr hazırlığı məsələləri ətrafında fikir mübadiləsi aparılıb, eləcə də şəhərdə fəaliyyət göstərən hotel, sanatoriya və müalicə-sağlamlıq müəssisələrinin rəhbərləri dinlənilərək onların sağlamlıq turizminin inkişafı, xidmət keyfiyyətinin yüksəldilməsi, kadr hazırlığı və gələcək əməkdaşlıq imkanları ilə bağlı təklifləri dinlənilib.
