Beyləqan Rayon Mərkəzi Xəstəxanasının tabeliyində fəaliyyət göstərən I Şahsevən Ailə Sağlamlıq Mərkəzinin əməkdaşları tərəfindən I Şahsevən kənd 2 saylı körpələr evi–uşaq bağçasında profilaktik tibbi müayinələr keçirilib.

Aztibb.az xəbər verir ki, müayinələr zamanı uşaqların ümumi sağlamlıq vəziyyəti qiymətləndirilib və zəruri tibbi baxışlar aparılıb. Eyni zamanda, bağça heyətinə uşaqların sağlamlığının qorunması ilə bağlı vacib tövsiyələr verilib.

Tədbir çərçivəsində uşaqlarla maarifləndirici söhbətlər də aparılıb. Onlara düzgün qidalanma, şəxsi gigiyena qaydalarına riayət etməyin əhəmiyyəti və sağlam həyat tərzi barədə yaşlarına uyğun faydalı məsləhətlər verilib.

Profilaktik müayinələrin keçirilməsində əsas məqsəd uşaqların sağlamlığını qorumaq, yarana biləcək xəstəlikləri erkən mərhələdə aşkarlamaq və azyaşlılar arasında sağlam həyat vərdişlərini təşviq etməkdir.