Azərbaycan Tibb Universitetinin (ATU) Stomatologiya fakültəsinin tələbəsi Tina Kərimi Niderlandın Groningen Universitetində keçirilən 33-cü Beynəlxalq Tələbə (Bio)Tibb Elmləri Konqresi – ISCOMS 2026-da universitetimizi uğurla təmsil edib. 

Bu barədə Universitetdən Aztibb.az-a xəbər verilib.

Tina Kərimi konqres çərçivəsində “Semaglutid (Ozempic) müalicəsinin ağız sağlamlığına təsiri: Klinik müşahidə” adlı elmi tədqiqat işini şifahi təqdimat formatında təqdim edib. Tədqiqatda semaglutid müalicəsinin ağız sağlamlığına təsiri klinik müşahidələr əsasında qiymətləndirilib, əldə olunan nəticələr isə beynəlxalq elmi ictimaiyyətin müzakirəsinə çıxarılıb. Ağız sağlamlığı sahəsində elmi biliklərin genişləndirilməsinə xidmət edən bu araşdırma BMT-nin Dayanıqlı İnkişaf Məqsədlərinin 3-cü məqsədi – “Sağlam həyatın təmin edilməsi və hər yaşda rifahın təşviqi”istiqamətində aparılan elmi fəaliyyətlərə töhfə verir.

Qeyd edək ki, dünyanın nüfuzlu tələbə elmi platformalarından biri hesab olunan ISCOMS 2026 bu il 62 ölkədən 589 iştirakçını bir araya gətirib. Konqres çərçivəsində tibb və biotibb elmlərinin aktual istiqamətləri üzrə elmi məruzələr təqdim olunub, tanınmış alim və professorların iştirakı ilə müzakirələr aparılıb, gənc tədqiqatçılar arasında beynəlxalq elmi əməkdaşlığın inkişafına əlverişli imkanlar yaradılıb.

ATU tələbəsinin belə mötəbər beynəlxalq elmi tədbirdə uğurla çıxış etməsi universitetdə elmi-tədqiqat fəaliyyətinin inkişaf etdirilməsi, tələbələrin qlobal akademik mühitə inteqrasiyası və beynəlxalq elmi əməkdaşlığın genişləndirilməsi istiqamətində görülən işlərin nəticəsidir. Bu baxımdan, konqresdə iştirak BMT-nin Dayanıqlı İnkişaf Məqsədlərinin 4-cü məqsədi – “Keyfiyyətli təhsil” çərçivəsində tələbələrin tədqiqat bacarıqlarının və akademik potensialının gücləndirilməsinə, eləcə də 17-ci məqsədi – “Məqsədlər naminə tərəfdaşlıqlar” istiqamətində beynəlxalq elmi əlaqələrin möhkəmləndirilməsinə xidmət edir.