Mərkəzi Gömrük Hospitalının Uşaq Cərrahiyyəsi şöbəsinin rəisi, uzman uşaq cərrahı Vüsal Cəfərov tərəfindən anadangəlmə penil kordi (penil kurvatur) diaqnozu qoyulmuş pasiyent üzərində uğurlu cərrahi əməliyyat icra olunub.

Aztibb.az xəbər verir ki, həkimin sözlərinə görə, penil kordi (penil kurvatur) cinsiyyət üzvünün anadangəlmə əyriliyi ilə xarakterizə olunan inkişaf qüsurudur. Bu vəziyyət gələcəkdə həm funksional, həm də psixoloji problemlərə səbəb ola biləcəyindən vaxtında diaqnostika və cərrahi müalicə xüsusi əhəmiyyət daşıyır.

Əməliyyat zamanı cinsiyyət üzvünün anatomik quruluşu bərpa edilərək əyrilik aradan qaldırılıb. Cərrahi müdaxilə uğurla başa çatıb. Pasiyentin əməliyyatdan sonrakı vəziyyəti qənaətbəxş qiymətləndirilir, sağalma prosesi isə həkim nəzarəti altında davam edir.

Xatırladaq ki, Mərkəzi Gömrük Hospitalının Uşaq Cərrahiyyəsi şöbəsində uşaqlarda anadangəlmə inkişaf qüsurları, sidik-cinsiyyət sistemi xəstəlikləri və digər mürəkkəb cərrahi patologiyaların diaqnostikası və müasir cərrahi müalicəsi beynəlxalq standartlara uyğun şəkildə həyata keçirilir.