Beyləqan Rayon Mərkəzi Xəstəxanasının təşkilatçılığı ilə əhalinin keyfiyyətli və əlçatan tibbi xidmətlərlə təmin olunması istiqamətində həyata keçirilən tədbirlər çərçivəsində rayonun Aşağı Çəmənli kəndində növbəti səyyar həkim müayinəsi təşkil edilib.

 

Aztibb.az-a Beyləqan RMX-dan verilən xəbərə görə, səyyar tibbi aksiya zamanı kənd sakinləri müxtəlif ixtisaslı həkimlər tərəfindən müayinə olunub, onların sağlamlıq vəziyyəti qiymətləndirilib, şikayətləri dinlənilib və zəruri tibbi məsləhətlər verilib. Eyni zamanda ehtiyac olan vətəndaşlara əlavə müayinə və müalicə ilə bağlı tövsiyələr təqdim olunub, ixtisaslaşmış tibbi xidmətə ehtiyacı olan şəxslərin növbəti mərhələdə aidiyyəti üzrə yönləndirilməsi təmin edilib.

 

Keçirilən səyyar müayinə çərçivəsində 40-a yaxın vətəndaşa ümumilikdə 56 adda tibbi xidmət göstərilib. Göstərilən xidmətlərə terapevt, pediatr, nevroloq, ginekoloq və digər ixtisaslı həkimlərin müayinələri, arterial təzyiqin ölçülməsi, qanda şəkərin təyini və digər zəruri tibbi prosedurlar daxil olub.

 

Səyyar tibbi müayinələrin keçirilməsində əsas məqsəd kəndlərdə yaşayan əhalinin tibbi xidmətlərə çıxış imkanlarını genişləndirmək, xəstəliklərin erkən mərhələdə aşkarlanmasına nail olmaq, profilaktik tədbirləri gücləndirmək və vətəndaşların sağlamlıq göstəricilərinin yaxşılaşdırılmasına töhfə verməkdir.

 

Beyləqan Rayon Mərkəzi Xəstəxanası tərəfindən əhalinin sağlamlığının qorunması istiqamətində həyata keçirilən bu cür səyyar tibbi aksiyaların gələcəkdə də rayonun digər yaşayış məntəqələrində davam etdirilməsi nəzərdə tutulur. Bu təşəbbüs sakinlər tərəfindən məmnunluqla qarşılanıb və onların keyfiyyətli tibbi xidmətlərdən rahat şəkildə yararlanmasına imkan yaradıb