Quba Rayon Mərkəzi Xəstəxanasının həkim və tibb işçilərindən ibarət səyyar briqadanın iştirakı ilə rayonun Qonaqkənd kənd sakinləri üçün tibbi müayinə həyata keçirilib.

Aztibb.az-a Quba RMX-dan verilən məlumata görə, müayinələrdə pediatr, şüa-diaqnostika həkimi, laborant, mama-ginekoloq, oftalmoloq, nevropatoloq, terapevt və cərrah iştirak edib. Kənd sakinləri instrumental-diaqnostik müayinələrdən keçirilib, onlardan laborator analizlər götürülüb və aparılan müayinələrə əsasən müalicə təyin edilib.

Səyyar tibbi müayinələr zamanı 9-u uşaq, 48 nəfər 18 yaşdan yuxarı olmaqla, ümumilikdə 67 nəfər kənd sakini cəlb edilib. Sakinlərə icbari tibbi sığortanın Xidmətlər Zərfi çərçivəsində 205 adda tibbi xidmət göstərilib.

Qeyd edək ki, tibbi müayinələrin əsas məqsədi ahıl və həssas qruplara daxil olan əhalinin tibbi xidmətə əlçatanlığını təmin etmək, TƏBİB-in və icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işləri aparmaqdır.