Kəllə sümükləri, beyin toxumaları və qan damarları bir-birinə bitişik halda dünyaya gələn Mersi və Qudnes adlı əkiz bacılar uzun saatlar davam edən unikal cərrahiyyə əməliyyatı sayəsində uğurla ayrılıblar. Nigeriyanın Ekiti ştatında doğulan bu siyam əkizlərinin xilas edilməsini altı aylıq olduqları vaxtdan etibarən analoji körpələrə yardım edən Böyük Britaniyanın "Gemini Untwined" xeyriyyə təşkilatı öz üzərinə götürüb.

Bu barədə Aztibb.az nypost.com-a istinadla xəbər verir.

Tibb elmində baş nahiyəsindən bitişik doğulan belə uşaqlar kraniopaqlar adlanır ki, bu növə bütün siyam əkizlərinin cəmi 5 faizində rast gəlinir və bu, dünyada hər altı milyon doğuşdan birində qeydə alınan nadir anomaliyadır. Böyük Britaniya, BƏƏ, Braziliya və Nigeriyadan olan 60 nəfərlik yüksək ixtisaslı mütəxəssis qrupu körpələrin 19 aylığı tamam olduqdan sonra mərhələli müalicəyə başlayıblar. Onlar dörd ay ərzində ümumi müddəti 40 saata bərabər olan bir neçə ağır əməliyyat həyata keçiriblər.

Əbu-Dabi tibb mərkəzində baş tutan və düz 12 saat davam edən final əməliyyatında həkimlər hər addımı qabaqcadan dəqiqliklə hesablamaq üçün süni intellekt, 3D modelləşdirmə, virtual və artırılmış reallıq texnologiyalarından istifadə ediblər. Bu innovativ üsul sayəsində beyindəki venaları və arteriyaları zədələmədən ayırmaq üçün qüsursuz hərəkət planı qurulub. Cərrahlar həmçinin süni intellektin köməyi ilə qızların başına silikon dəri ekspanderləri yerləşdiriblər ki, bu da dərinin təbii şəkildə dartılaraq genişlənməsinə və yeni yaranan kəllə sümüklərini tam örtməsinə şərait yaradıb. Beləliklə, xəstələrə əlavə dəri köçürülməsinə ehtiyac qalmayıb.

Sözügedən əməliyyat sözügedən xeyriyyə şirkətinin praktikasında doqquzuncu uğurlu icraat olmaqla yanaşı, mürəkkəb cərrahiyyədə süni intellektin imkanlarından istifadə baxımından tibb tarixinə düşəcək mühüm bir addımdır. Artıq tam sağalan balaca bacılar öz evlərinə, Nigeriyaya geri dönüblər.