İnsanlar neyroşəbəkələrdən nə qədər çox istifadə edirsə, məlumatı bir o qədər pis yadda saxlayırlar. Kliniki psixoloq İrina Qrekovanın izahına görə, bunun səbəbi beynin “tənbəlləşməsi”dir.

Aztibb.az "Life" portalına istinadən yazır ki, araşdırmaya görə asanlıqla əldə edilən məlumatı beyin dəyərli hesab etmir.

Əvvəllər lazım olan məlumatları oxumaq, konspekt etmək və ucadan təkrar etmək tələb olunurdu. Məhz bu cür zehni səylər biliklərin illərlə yadda qalmasını təmin edirdi. İndi isə beyin bu funksiyanı yəni rəqəmsal cihazlara “ötürüb”.

Psixoloqun sözlərinə görə, beyin məlumatın özünü deyil, onun harada tapılacağını, yəni interneti yadda saxlayır. Buna əlavə olaraq informasiya yüklənməsi də var. İnsanlara əvvəlkindən dəfələrlə çox mətn, audio və video çatır və psixika özünü qorumaq üçün bir hissəsini süni intellektə həvalə edir.

“Beyin hələ bütün bu informasiyanı emal edib uzunmüddətli yaddaşa çevirməyə uyğun səviyyədə təkamül etməyib. Psixika bizi yüklənmədən qoruyur və rəqəmsal cihazlardan gələn böyük informasiya axınını sadəcə sıxışdırıb çıxarır”, — deyə ekspert müsahibəsində bildirib.