Çinli həkimlər dünyada ilk dəfə olaraq beyin ölümü təsdiqlənmiş insana eyni anda bir neçə donuz orqanının transplantasiyasını həyata keçiriblər. 

Aztibb.az "South China Morning Post" nəşrinə istinadən yazır ki, eksperiment təxminən beş gün davam edib.

Məlumata görə, tədqiqat donuzun bütöv qaraciyərinin insana ortotopik transplantasiyasının, eləcə də hər iki böyrəyin eyni vaxtda köçürülməsinin mümkünlüyünə dair ilkin elmi sübutlar təqdim edir.

Əməliyyat Çindəki Guangxi Tibb Universitetinin İkinci Xəstəxanası mütəxəssisləri tərəfindən həyata keçirilib. Pasiyent beyin ölümü diaqnozu qoyulmuş 53 yaşlı kişi olub. Transplantasiyadan sonra köçürülən orqanlar təxminən beş gün ərzində fəaliyyət göstərib. Daha sonra pasiyentin ailəsinin qərarı ilə eksperiment dayandırılıb.

Bundan əvvəl oxşar tədqiqatlar əsasən ayrı-ayrı donuz orqanlarının insanlara köçürülməsi ilə məhdudlaşırdı. Çünki bir neçə orqanın eyni vaxtda transplantasiyası daha mürəkkəb hesab olunur və orqanizmin onları rədd etməsi riski daha yüksəkdir.

Araşdırmanın müəllifləri vurğulayıblar ki, əldə edilən nəticələr hələlik ilkin xarakter daşıyır və gələcək klinik sınaqlarla təsdiqlənməlidir. Mütəxəssislər çoxorqanlı ksenotransplantasiya istiqamətində tədqiqatları davam etdirməyi və bu üsulu oxşar diaqnozu olan digər pasiyentlər üzərində də sınaqdan keçirməyi planlaşdırırlar.