1 İyun – Uşaqların Beynəlxalq Müdafiəsi Günü münasibətilə Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutu tərəfindən “Böyük Qayıdış” Dövlət Proqramı çərçivəsində Xankəndi şəhərində yaşayan uşaqlar üçün genişmiqyaslı səyyar tibbi müayinələr təşkil olunub.

Aztibb.az AZƏRTAC-a istinadla xəbər verir ki, bu təşəbbüs azad olunmuş ərazilərə qayıdan ailələrin övladlarının keyfiyyətli səhiyyə xidmətlərinə çıxışını gücləndirmək və uşaqların sağlam inkişafını dəstəkləmək məqsədi daşıyıb. Aksiya çərçivəsində institutun yüksəkixtisaslı həkim komandası – pediatrlar, nevroloqlar, kardioloqlar, endokrinoloqlar, oftalmoloqlar, otorinolarinqoloqlar və digər mütəxəssislər uşaqları hərtərəfli tibbi müayinədən keçirib. Onların ümumi sağlamlıq vəziyyəti qiymətləndirilib, profilaktik baxışlar aparılıb, zəruri laborator və instrumental müayinələr icra olunub.

Aşkarlanan xəstəliklər və sağlamlıq problemləri ilə bağlı valideynlərə ətraflı tibbi məsləhətlər verilib, fərdi tövsiyələr təqdim edilib. Ehtiyac yarandığı hallarda uşaqların ixtisaslaşmış tibb müəssisələrində müalicə və davamlı nəzarətə yönləndirilməsi təmin olunub.

Bununla yanaşı, valideynlərlə maarifləndirici görüşlər keçirilib. Həmin görüşlərdə uşaqların düzgün qidalanması, peyvəndlənmə, mövsümi xəstəliklərdən qorunma, sağlam həyat tərzi və psixoloji inkişaf kimi mühüm mövzular ətraflı izah olunub.

Ümumilikdə 310-a yaxın uşaq tibbi baxışdan keçirilib.

Eyni zamanda, K.Y.Fərəcova adına Elmi-Tədqiqat Pediatriya İnstitutunun heyəti 1 İyun – Uşaqların Beynəlxalq Müdafiəsi Günü münasibətilə bayram tədbiri də təşkil edib. Uşaqların sevinc dolu anlar yaşaması, onların bayram əhvali-ruhiyyəsini hiss etməsi üçün xüsusi proqram hazırlanıb. Xankəndi şəhəri Nizami Gəncəvi adına 4 saylı tam orta məktəbdə uşaqlara müxtəlif hədiyyələr paylanılıb və tədbirin sonunda havaya sülh, əmin-amanlıq nişanəsi olan ağ və mavi rəngdə şarlar uçurulub.