1 İyun – Uşaqların Beynəlxalq Müdafiəsi Günü münasibətilə Azərbaycan Tibb Universitetinin (ATU) Tədris Cərrahiyyə Klinikasında genişmiqyaslı pulsuz müayinə aksiyası təşkil olunub.

 

Klinikadan Aztibb.az-a verilən məlumata görə, kampaniya çərçivəsində klinikanın Neonatologiya və Uşaq Cərrahiyyəsi şöbələrinin yüksəkixtisaslı mütəxəssisləri tərəfindən uşaqlara ödənişsiz tibbi baxış keçirilib. Aksiya zamanı təxminən 50-ə yaxın uşaq müayinə olunaraq onların sağlamlıq vəziyyəti qiymətləndirilib.

 

Müayinələr zamanı uşaqlarda aşkarlanan müxtəlif sağlamlıq problemləri ilə bağlı valideynlərə ətraflı məlumat verilib, müalicə və profilaktik tədbirlər barədə tövsiyələr təqdim olunub. Eyni zamanda, əlavə müayinə və cərrahi müdaxilə tələb edən pasiyentlər müəyyən edilərək onların növbəti müalicə planı hazırlanıb. Bir sıra uşaqlara planlı əməliyyatların icrası tövsiyə olunub və onların klinikada müvafiq qaydada müalicəyə cəlb edilməsi nəzərdə tutulub.

 

Kampaniyanın əsas məqsədi uşaqların sağlamlığının vaxtında qiymətləndirilməsi, valideynlərin maarifləndirilməsi və ehtiyac duyan uşaqların ixtisaslaşmış tibbi yardıma əlçatanlığının artırılması olub.

 

Qeyd edək ki, Tədris Cərrahiyyə klinikasında uşaqların sağlamlığının qorunması və erkən diaqnostikanın təşviqi məqsədilə təşkil olunan bu cür sosial yönümlü aksiyalar gələcəkdə də davam etdiriləcək. Bu təşəbbüs valideynlər tərəfindən böyük məmnunluqla qarşılanıb.