Apple istifadəçilərin sağlamlıq göstəricilərini analiz edən və fərdi tövsiyələr təqdim edən “AI-həkim” sistemi üzərində çalışır. Texnologiyanın əsasını “Health” tətbiqində toplanan məlumatlar və Apple Watch sensorlarından əldə olunan biometrik göstəricilər təşkil edir.

Aztibb.az "Actual news"a istinadən yazır ki, sistem ürək ritmi, yuxu keyfiyyəti, fiziki aktivlik, sərf olunan kalori və məşq zamanı qeydə alınan göstəriciləri analiz edərək istifadəçiyə fərdiləşdirilmiş sağlamlıq ssenariləri təqdim edir. Buraya qidalanma rejiminin tənzimlənməsi, gündəlik yüklənməyə uyğun məşq proqramlarının seçilməsi və həyat tərzi ilə bağlı tövsiyələr daxildir.

Məlumata görə, süni intellekt həmçinin istirahət zamanı nəbzin qəfil yüksəlməsi kimi qeyri-adi dəyişiklikləri aşkar edərək istifadəçini stress və digər risk faktorlarına diqqət yetirməyə çağıracaq.

Mütəxəssislər hesab edirlər ki, bu texnologiya profilaktik tibbdə yeni mərhələ yarada bilər.

Ekspert Melissa Green bildirib ki, insanların böyük əksəriyyəti ağıllı cihazların topladığı məlumatlardan effektiv istifadə etmir və rəqəmləri real tövsiyələrə çevirən sistem yanaşmanı dəyişə bilər.

Bununla belə, əsas müzakirə mövzusu süni intellektin həkim məsləhətlərini nə dərəcədə əvəz edə bilməsidir. Apple nümayəndələri sistemi tibbi platforma kimi deyil, “rəqəmsal rifah eksperti” kimi təqdim edirlər.

Bu arada FDA artıq bu tip AI sistemlərinin sertifikatlaşdırılması ilə bağlı müzakirələrə başlayıb.