Belçikada alimlərinin apardığı yeni tədqiqat Parkinson xəstəliyinin vahid bir xəstəlik deyil, bir neçə fərqli bioloji formadan ibarət ola biləcəyini ortaya qoyub.

Aztibb.az xəbər verir ki, araşdırmanın nəticələri "Nature Communications" jurnalında dərc edilib.

Tədqiqatçılar maşın öyrənməsi metodlarından istifadə edərək Parkinsonla əlaqəli 24 gen üzrə mutasiyaları daşıyan meyvə milçəyi modellərini analiz ediblər. Nəticədə xəstəlik iki əsas qrup və ümumilikdə beş alt tipə bölünüb. Bu isə eyni simptomların arxasında fərqli hüceyrə və molekulyar mexanizmlərin dayandığını göstərir.

Araşdırma həmçinin göstərib ki, bir alt tip üçün effektiv olan müalicə digər qrupda nəticə verməyə bilər. Bu fakt Parkinson üçün vahid müalicə yanaşmasının məhdud olduğunu təsdiqləyir və fərdiləşdirilmiş tibbin əhəmiyyətini artırır.

Alimlərin sözlərinə görə, tədqiqat hələ ilkin mərhələdədir və əsasən heyvan modellərinə əsaslanır. Növbəti mərhələdə bu alt tiplərin insanlarda da təsdiqlənməsi və bioloji markerlərin müəyyənləşdirilməsi planlaşdırılır. Bu, gələcəkdə daha dəqiq diaqnostika və hədəflənmiş müalicə imkanları yarada bilər.