Azərbaycan Tibb Universitetinin (ATU) Tədris Terapevtik Klinikasında Rezidentura və magistratura şöbəsi, II Uşaq xəstəlikləri kafedrası və Tələbə Həmkarlar İttifaqı Komitəsinin (THİK) təşkilatçılığı ilə “İrsi metabolik xəstəliklər: erkən diaqnostika, müasir yanaşmalar və profilaktik tədbirlər” mövzusuna həsr olunmuş elmi seminar keçirilib.

 

ATU-dan Aztibb.az-a bildirilib ki, seminarda Tədris Terapevtik Klinikasının baş həkimi Fəridə Hacıyeva irsi metabolik xəstəliklərin erkən diaqnostikası və düzgün klinik idarə olunmasının xəstələrin həyat keyfiyyətinin yaxşılaşdırılmasında mühüm rol oynadığını diqqətə çatdırıb.

 

II Uşaq xəstəlikləri kafedrasının müdiri, professor Nailə Sultanova irsi metabolik xəstəliklər, o cümlədən daşıyıcı zülal və kofaktor defektləri, metabolik pozğunluqlar, toksik metabolitlərin toplanması və s. məsələlər hadqa ətraflı məlumat verib.

 

THİK-in sədri, II Uşaq xəstəlikləri kafedrasının assistenti, Tədris Terapevtik Klinikasının Uşaq sağlamlığı və xəstəlikləri şöbəsinin rəhbəri Qoşqar İsmayılov metabolik və genetik xəstəliklərin müalicəsində müasir təbabətin rolu haqqında bəhs edib.

 

“Leyla Medical Center”-in uşaq metabolik xəstəlikləri üzrə mütəxəssisi Ləman Əlirzayeva “İrsi metabolik xəstəliklərin diaqnostika və müalicəsi”, adıçəkilən xəstəxananın diyetoloqu Türkan Sultanlı isə “İrsi metabolik xəstəliklərdə diyet bir müalicədir” mövzusunda çıxış ediblər.

 

Seminarda müxtəlif ixtisaslar üzrə rezident həkimlər, doktorantlar və klinikanın əməkdaşları mövzu ətrafında fikir mübadiləsi aparıblar.