Universitetdən Aztibb.az-a bildirilib ki, "Tibbdə morfologiya: fundamental nəzəriyyələrdən klinik həllərə" adlı I Beynəlxalq Elmi-Praktik Konfrans çərçivəsində ATU-nun Müalicə-profilaktika fakültəsinin tələbələri Vüsal Salahov və Ağasəf Cəfərov "Characterization of behavioral, cognitive, and ultrastructural changes induced by wireless earphones in mice" (“Naqilsiz qulaqlıqların təsirindən siçanlarda baş verən davranış, koqnitiv və ultrastruktural dəyişikliklərin xarakteristikası”) adlı məruzə ilə çıxış edərək I yerə layiq görülüblər.

 

Eyni zamanda, digər tələbələrimiz Təhminə Musazadə və Nina Alquliyeva "Elm: dünən, bu gün, sabah" Gənc Alimlərin LXV Beynəlxalq Elmi Konfransında “Ultrastructural characterization of intestinal barrier disruption in the epithelial layer of the small intestine due to MIF exposure (MIF-in təsirindən nazik bağırsağın epitel təbəqəsində bağırsaq baryerinin pozulmasının ultrastruktur xarakteristikası)” mövzusunda çıxış edərək II yer tutublar. Tələbələrimiz beynəlxalq sertifikat və diplomlarla təltif ediliblər.

 

Qeyd edək ki, təqdim olunan elmi işlər ATU-nun Sitologiya, embriologiya və histologiya, Patoloji fiziologiya kafedralarında və Elmi Araşdırmalar Mərkəzinin Elektron Mikroskopiya şöbəsində yerinə yetirilib. Elmi işlərə professor Eldar Qasımov, dosent Fuad Rzayev, dosent Günel Əyyubova, dosent Gülnarə İbrahimova, dosent Məlahət Talışınskaya, baş müəllim Azər Mənsimov və baş müəllim Nigar Quliyeva rəhbərlik ediblər.