Yeni Klinika nəzdində fəaliyyət göstərən TƏBİB Akademiyası, “Həkimlər və TƏBİB Tələbələr” İctimai Birliyinin birgə əməkdaşlığı çərçivəsində həyata keçirilən "Xarici Tələbələrin Tibbi Təcrübə Proqramı" uğurla başa çatıb.

 

Klinikadan Aztibb.az-a bildirilib ki, proqram çərçivəsində Türkiyə, Fransa, Çexiya, Avstriya və Slovakiyadan olan tibb tələbələri bir ay müddətində Yeni Klinikada tibbi təcrübə keçərək həm nəzəri biliklərini artırmaq, həm də praktik bacarıqlar qazanmaq imkanı əldə ediblər.

 

Tələbələrlə görüşən Barat Yusubov beynəlxalq təcrübə proqramınının əhəmiyyətini vurğulayaraq bu kimi layihələrin onların gələcək karyeralarında mühüm rol oynayacağını bildirib. O, proqramın yalnız tibbi bilik və bacarıqların artırılması baxımından deyil, eyni zamanda mədəniyyətlərarası əlaqələrin gücləndirilməsi və beynəlxalq əməkdaşlıq imkanlarının genişləndirilməsi baxımından da dəyərli olduğunu qeyd edib. Təcrübə proqramını uğurla başa vuran tələbələri təbrik edən Barat Yusubov onlara gələcək fəaliyyətlərində uğurlar arzulayıb və Yeni Klinikanın belə təşəbbüslərə hər zaman açıq olduğunu vurğulayıb.

 

Tələbələr Travmatologiya, Qastroenterologiya, Ümumi cərrahiyyə, Uşaq cərrahiyyəsi və digər şöbələrdə klinik fəaliyyətlərlə yaxından tanış olaraq tibbi prosesləri yaxından müşahidə etməklə yanaşı praktiki məşğələlərdə iştirak ediblər.

 

Təcrübə proqramı çərçivəsində həmçinin tələbələrə Yeni Klinikanın təcili və təxirəsalınmaz tibbi yardım üzrə həkimi Fəxriyyə Quliyeva tərəfindən “Basic Life Support – Təməl Yaşam Dəstəyi” mövzusunda həm nəzəri bilikləri əhatə edən, həm də praktik bacarıqların aşılandığı təlimlər keçirilib. Təlim zamanı təcili tibbi yardımın ilkin mərhələlərinə dair əsas prinsiplər, ürək-ağciyər reanimasiyası (CPR), hava yolunun açılması və süni tənəffüs kimi həyati vacib müdaxilələr barədə məlumat verilib eyni zamanda simulyasiya avadanlıqları vasitəsilə real situasiyaya yaxın şəraitdə məşğələlər aparılıb.

 

Bir ay müddətində davam edən təcrübə proqramının sonunda 6 tibb tələbəsi sertifikatla təmin edilib. Eyni zamanda, mübadilə proqramının nümunəvi təşkilində göstərdikləri yüksək peşəkarlıq və dəstəyə görə Travmatologiya şöbəsinin müdiri Fərhad Verdiyev və Uşaq cərrahiyyəsinin müdiri Orxan Fərzəliyev təşəkkürnamə ilə təltif ediliblər.

 

Qeyd edək ki, “Xarici Tələbələrin Tibbi Təcrübə Proqramı” çərçivəsində mübadilə prosesinin növbəti ay üçün də davam etdirilməsi nəzərdə tutulur.