Ölkəmizdə səfərdə olan Türkiyə Respublikası Səhiyyə Nazirliyinin nümayəndə heyəti ilə TƏBİB arasında qarşılıqlı çoxistiqamətli əməkdaşlıq çərçivəsində müzakirələr aparılıb.

 

Görüş zamanı Türkiyə ilə Azərbaycan hökümətləri arasında “Səhiyyə və tibb elmləri sahəsində” əməkdaşlıq sazişini rəhbər tutaraq “Qardaşlaşmış Xəstəxana” memorandumu imzalanıb.

 

Memorandum ilkin mərhələdə Kliniki Tibbi Mərkəz və Gülhanə Təhsil və Tədqiqat Xəstəxanası, eyni zamanda K.Fərəcova adına Pediatriya İnstitutu və Ankara Şəhər Xəstəxanasının Uşaq Xəstəxanasını əhatə edib.

 

İmzalanma mərasimində TƏBİB İdarə Heyətinin sədri Ramin Bayramlı, Türkiyə Respublikası Səhiyyə Nazirliyinin Avropa Birliyi və Xarici Əlaqələr Baş İdarəsinin rəhbəri Səlami Kılıç, Pediatriya İnstitutunun direktoru Allahverdi Musayev, Ankara Şəhər Xəstəxanasının Uşaq xəstəxanasının baş həkimi, prof. Emrah Şenel, Kliniki Tibbi Mərkəzin direktoru İlham Qafarov, Gülhanə Təhsil və Tədqiqat xəstəxanasının baş həkimi Serkan Gökkaya iştirak edib.