TƏBİB-in təşkilatçılığı ilə Masallı Rayon Mərkəzi Xəstəxanasında “Ürək əməliyyatlarından sonrakı dövrdə pasiyentlərin müayinə və müalicə prinsipləri” mövzusunda seminar təşkil olunub. Seminar Almaniyanın Vürzburq Universitetinin Toraks, Ürək və Torokal Damar Cərrahiyyəsi Klinikasının ürək cərrahı Seymur Kərimlinin təqdimatında baş tutub.
Bu barədə Aztibb.az-a TƏBİB-dən xəbər verilib.
Təlimdə Masallı, Astara, Biləsuvar və Cəlilabad rayon mərkəzi xəstəxanalarının kardioloqları, terapevtləri, pediatrları, eləcə də İlkin səhiyyə xidmətləri və Təcili tibbi yardım şöbələrinin həkimləri iştirak ediblər. Ümumilikdə 120-dən çox iştirakçının qatıldığı tədbir mövzunun aktuallığı baxımından böyük maraqla qarşılanıb.
Seminarda vurğulanıb ki, ürək-damar cərrahiyyəsi sahəsində əldə olunan nailiyyətlər minlərlə insana ikinci həyat bəxş edir. Lakin bu proses təkcə əməliyyatla yekunlaşmır. Əməliyyatdan sonrakı mərhələdə reabilitasiya, müntəzəm müşahidə, davamlı tibbi nəzarət, effektiv müayinə, vaxtında müdaxilə və pasiyentə fərdi yanaşma xüsusi əhəmiyyət daşıyır.
Seymur Kərimli bu sahədə beynəlxalq təcrübəyə əsaslanan praktik tövsiyələrini iştirakçılarla bölüşüb.
Tədbir həkimlərin aktiv iştirakı, sual-cavab sessiyası və qarşılıqlı müzakirələrlə davam edib.
