Oğuz Rayon Mərkəzi Xəstəxanasının həkim və tibb işçilərindən ibarət briqadanın iştirakı ilə Oğuz rayonunun Maluq, Böyük Söyüdlü, Çaldaş və Qarabulaq kənd sakinləri tibbi müayinələrə cəlb edilib.

 

Müayinələr Oğuz Rayon Mərkəzi Xəstəxanasının tabeliyində fəaliyyət göstərən Böyük Söyüdlü və Maluq kənd tibb məntəqələrində həyata keçirilib.

 

Bu barədə Aztibb.az-a Xəstəxanadan məlumat verilib.

 

Tibbi müayinələrə ümumilikdə 45 nəfər kənd sakinləri cəlb edilib. Onlara 90-dan çox tibbi xidmət göstərilib.

 

Vətəndaşlar terapevtik, pediatrik, kardioloji, nevroloji və USM müayinəsinə cəlb edilib. Müayinələr zamanı xəstəlik aşkarlanan şəxslər ixtisaslı tibb müəssisələrinə yönləndirilib.

 

Bununla yanaşı, müayinələrə cəlb edilən vətəndaşlarla müxtəlif xəstəliklər və tibbi problemlər barədə maarifləndirici profilaktik söhbətlər aparılıb.

 

TƏBİB ahıl və həssas qruplara daxil olan şəxslərin, uşaq, hamilə və zahı qadınların yerində müşahidəsini aparmaq, tibbi xidmətlərə əlçatanlığı təmin etmək, o cümlədən icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işinin gücləndirilməsinə dəstək məqsədilə kənd yerlərində tibbi müayinə tədbirlərini davam etdirir.