ÜST-nin missiyası ölkədə peyvənd təhlükəsizliyinə nəzarət sisteminin təkmilləşdirilməsinə dəstək göstərmək məqsədilə Azərbaycanda səfərdədir.

Bu barədə Aztibb.az-a ÜST-nin Azərbaycan Nümayəndəliyindən xəbər verilib.

Bildirilib ki, 19–23 may 2025-ci il tarixlərini əhatə edən missiya çərçivəsində immunizasiyadan sonra arzuolunmaz halların vaxtında aşkarlanması, səbəb-nəticə əlaqələrinin qiymətləndirilməsi və düzgün araşdırılması, məlumatların şəffaf və aydın şəkildə tibb işçilərinə və ictimaiyyətə çatdırılması məsələləri müzakirə olunacaq.

Peyvəndlər nadir hallarda arzuolunmaz hallara səbəb olsa da, yayılan yanlış və gecikmiş məlumatlar cəmiyyətdə narahatlıq doğura bilər. Bu səbəbdən təhlükəsizliyə nəzarət sistemlərinin gücləndirilməsi, ictimai inamın qorunması və daha geniş əhali qruplarının peyvəndlərlə əhatə olunması baxımından vacibdir.

Bu missiya "Qlobal Peyvənd Təhlükəsizliyi Fəaliyyət Planı və İmmunlaşdırma Gündəliyi - 2030" kimi dayanıqlı peyvənd sistemlərinin yaradılmasını hədəfləyən beynəlxalq təşəbbüslərə uyğun olaraq həyata keçirilir.