“Nature Medicine” jurnalında dərc olunmuş yeni bir faza III klinik tədqiqatın nəticələrinə görə, miqren müalicəsində istifadə olunan “Ubrogepant” adlı dərman yalnız baş ağrısının özünü deyil, eyni zamanda, baş ağrısından əvvəlki mərhələdə (prodromal və ya aura fazası) müşahidə olunan simptomları da əhəmiyyətli dərəcədə azalda bilər.

Aztibb.az www.technologynetworks.com portalına istinadla xəbər verir ki, bu tapıntı “Ubrogepant”ın miqrenin erkən xəbərdarlıq əlamətləri üçün təsdiqlənmiş ilk kəskin müalicə vasitəsi ola biləcəyini göstərir. Miqrenin prodromal mərhələsində işığa və səsə həssaslıq, ürəkbulanma, boyun ağrısı və başgicəllənmə kimi simptomlar baş verə bilər ki, bunlar da gündəlik fəaliyyətə ciddi təsir göstərir. Bu mərhələnin simptomlarına qarşı effektiv müalicə metodları indiyə qədər geniş şəkildə tədqiq olunmayıb.

Tədqiqatda miqren diaqnozu qoyulmuş, ən azı bir illik miqren tarixçəsinə malik olan 438 nəfər iştirak edib. İştirakçılar ikiqat kor metodologiya ilə təsadüfi olaraq iki qrupa bölünüb və prodromal simptomlar müşahidə edildiyi anda ya 100 mq “ubrogepant”, ya da “plasebo” qəbul ediblər. Sonra iştirakçılar ikinci prodromal epizod zamanı əks müalicəni qəbul ediblər.

Nəticələr göstərib ki, “Ubrogepant” qəbul edən iştirakçılar müalicədən bir saat sonra konsentrasiya qabiliyyətində yaxşılaşma, iki saat sonra işığa qarşı həssaslıqda azalma, üç saat sonra isə yorğunluq və boyun ağrısında əhəmiyyətli azalma bildiriblər. Bundan əlavə, başgicəllənmə və səsə həssaslıq kimi digər simptomlar da 4-24 saat ərzində azalıb. Bu nəticələr dərman vasitəsinin yalnız miqren baş ağrısının deyil, həm də prodromal simptomların idarə olunmasında təsirli olduğunu ortaya qoyur. Bununla belə, tədqiqatçılar dərmanın prodromal simptomlara təsirini daha dəqiq qiymətləndirmək üçün əlavə tədqiqatlara ehtiyac olduğunu vurğulayırlar.