Şəmkir-Tovuz bölgəsi üzrə fəaliyyət göstərən Təcili Tibbi Yardım stansiyalarında çalışan həkim və orta tibb işçilərinin bilik və bacarıqlarının artırılması, göstərilən tibbi xidmətin keyfiyyətinin yüksəldilməsi məqsədilə genişmiqyaslı təlimlərə başlanılıb.
Respublika Təcili və Təxirəsalınmaz Tibbi Yardım Mərkəzindən Aztibb.az-a bildirilib ki, Simulyasiya şöbəsinin müdiri Təranə İbadova, təlimçilər Arzu Qurbanova və Fikrət Şəfiyevin iştirakı ilə keçirilən təlimlərdə tibbi personal üçün “Təməl Həyat Dəstəyi”, həkimlər üçün isə əlavə olaraq “Təkmil və Təməl Həyat Dəstəyi” mövzuları üzrə nəzəri və praktiki məşğələlər təşkil edilib.
Təlimlərdən əvvəl və sonra tibb işçilərinin bilik səviyyəsi xüsusi test vasitəsilə qiymətləndirilib. Bu yanaşma sayəsində təlimlərin effektivliyi və iştirakçıların bilik artımı obyektiv şəkildə ölçülüb.
