Rusiyanın tanınmış dietoloqu Marina Makişa orqanizmin immunitetini gücləndirmək üçün qışda hansı vitaminlərdən istifadə olunması və hansı qidalara diqqət yetirilməsi zəruriliyindən danışıb.

Aztibb.az iz.ru-ya istinadən xəbər verir ki, mütəxəssis qida rasionuna tərkibində zülalın yüksək olduğu məhsulları, məsələn əti, balığı, yumurtanı yetərli sayda əlavə etməyin əhəmiyyətli olduğunu deyib. Bildirib ki, rasionda zülalın çatışmazlığı immunitetin azalmasına gətirib çıxara bilər. 

Dietoloq, həmçinin vitaminlərin və antioksidləşdiricilərin əsas mənbəyi olan meyvələri, giləmeyvələri və tərəvəzləri məsləhət görüb.

"Qışda diqqəti turşuya qoyulmuş kələmə yönəltmək lazımdır, çünki onda bağırsaqların mikroflorasına və immun sisteminə müsbət təsir edən C vitamini var. Bundan başqa, rasiona mütləq D vitaminini daxil etməyə dəyər. Çünki günəşli günlərin sayı azalır və bu vitaminin çatışmazlığını aradan qaldırmaq lazımdır. Lakin bundan əvvəl orqanizmdə D vitamininin miqdarını bilmək üçün analizlər vermək lazımdır", - deyə M.Makişa bildirib.

Həkim depressiya simptomlarının meydana çıxması halında rasiona B6 maqneziumunu əlavə etməyi məsləhət görüb.