Rusiyanın tanınmış həkimi və televiziya aparıcısı Aleksandr Myasnikov COVID-19 xəstələrinin evdə müalicəsi zamanı yol verdikləri səhvlər barədə danışıb.

Aztibb.az-ın ria.ru-ya istinadən məlumatına görə, həkim vurğulayıb ki, xüsusi dərmanları, məsələn xlorokin, yalnız həkim təyinatı ilə istifadə etmək olar.

Onun sözlərinə görə, COVID-19-u antibiotiklərlə müalicə etmək düzgün yanaşma deyil. Bu yolla onlara qarşı müqavimət hazırlamaq olar ki, bu da gələcəkdə problemlərlə nəticələnə bilər. Koronavirusla mübarizədə isə preparatların bu qrupundan istifadə kömək etməyə bilər.

Həmçinin həkim qanı durulaşdıran preparatların qəbulundan çəkinməyi məsləhət bilib. O, qeyd edib ki, bu preparatlar beyin və mədə-bağırsaq qanaxmalarına səbəb olduğundan xəstəxana şəraitində ağır xəstələrin yalnız kiçik faizinə təyin oluna bilər.

Mütəxəssis vurğulayıb ki, yüksək temperatur zamanı parasetamol, köməkçi vasitələr kimi isə D və C vitaminləri, sink preparatları və interferon tərkibli burun damcıları qəbul etmək lazımdır.