Son araşdırmalara görə çili bibəri yeyən insanlar daha uzun ömürlü olur, bu tərəvəz ürək-damar xəstəliklərindən və ya xərçəngdən ölüm riskini azaldır.

Aztibb.az Eurek Alert-ə istinadən xəbər verir ki, Çili bibərinin orqanizmə təsirini analiz etmək üçün elm adamları dünyanın beş ən böyük sağlamlıq məlumat bazalarından (Ovid, Cochrane, Medline, Embase və Scopus) 4.729 tədqiqatı analiz ediblər.

Nəticədə mütəxəssislər ABŞ, İtaliya, Çin və İrandan 570 mindən çox insanın sağlamlığı və qidalanması ilə bağlı məlumatları nəzərdən keçiriblər. Çili bibərini nadir hallarda və ya heç yeməyən insanlara nisbətən, müntəzəm olaraq yeyən insanlarda ürək-damar ölümlərində 26%, xərçəng ölümlərində 23% və digər səbəblərdən ölüm hallarında 25% azalmış olub.

Tədqiqat müəllifi Klivlend Klinikasının Ürək, Damar və Torakal Sistem İnstitutunun kardioloqu həkim Bo Xu qeyd edib: "Tapıntıları izah edə biləcək dəqiq səbəblər və mexanizmlər hələ bilinmir. İstehlak edilən çilinin miqdarı və növünün də araşdırmalarda müxtəlif olduğunu nəzərə almalıyıq. Bu, sağlamlığı inkişaf etdirmək üçün nə qədər və hansı növ çili yeməli olduğunu müəyyənləşdirmir".