Səudiyyə Ərəbistanının Kral Abdullah Elm və Texnologiya Universitetinin (KAUST) alimləri koronavirusun bu günə qədərki ən real və yeni görüntüsünü yayıb.

Tədqiqatçılar apardıqları araşdırmanın COVID-19-a qarşı hazırlanan peyvəndlər, eləcə də müalicələr üçün dönüş nöqtəsi ola biləcəyini bildiriblər.

Aztibb.az medimagazin.com.tr-yə istinadən xəbər verir ki, 3D modelləşdirmədən istifadə edən elm adamları son məlumatları da əlavə edərək COVID-19-a səbəb olan xəstəliyin daxili və xarici quruluşunu xəritələşdiriblər.

Mövzu ilə bağlı açıqlama verən araşdırmaçı Ondrej Strnad bildirib ki, 3D modelimiz koronavirusun mövcud quruluşunu atom səviyyəsində göstərir və nukleokapsid zülalların əmələ gətirdiyi ipə bənzər quruluş kimi daha əvvəl görülməsi imkansız olan virusun xırdalıqlarını ortaya qoyur. 

"Modelin hazırlanmasında istifadə etdiyimiz yanaşma COVID-19-un yayılmasına qarşı aparılan elmi mübarizədə yeni yol aça bilər. Çünki bu texnologiya elm adamlarına yeni kəşf olunmuş məlumatları sürətlə modelə daxil etməyə və beləliklə, daim yenilənən bir onlayn resurs yaratmağa imkan verə bilər", - deyə O.Strnad bildirib.