Rusiyanın Virusologiya və Biotexnologiyalar Dövlət Elmi Mərkəzi - "Vektor"un mütəxəssisləri müəyyən ediblər ki, tozağacı göbələyi olan çaqanın su cövhəri yeni növ koronavirusun təsirini öldürür.

Aztibb.az ria.ru-ya istinadla xəbər verir ki, bu barədə Rusiya Elmlər Akademiyasının Sibir bölməsinin nəşri bildirir.

"Cövhər SARS-CoV-2-yə yüksək aktivlik göstərdi, çaqanın qoruyucu təsirinə və aşağı toksikliyinə görə isə, gələcəkdə onun əsasında antivirus preparatlarının yaradılması haqqında fikirləşmək olar", - deyə məlumatda bildirilir.

"Vektor"un Mikologiya kafedrasının professoru Tamara Teplyakovanın sözlərinə görə, bu metodika üzrə hazırlanmış çaqanın cövhərinin effektivliyini o, öz üzərində, həmçinin koronavirusa yoluxmuş həyat yoldaşı, qohumları və kolleqaları üzərində yoxlamalı olub. Yoluxanların hər biri simptomların 5-7 gün sonra aradan qalxdığını qeyd ediblər. Çaqanın əhəmiyyətli xüsusiyyətlərindən biri isə onun qanın axınını sürətləndirməsidir.

"Çaqa əsasında dərman preparatı əldə etmək üçün sonrakı tədqiqatlara ehtiyac var. Lakin, hər halda, təhlükəsiz cövhər və çaqadan hazırlanmış adi çayı profilaktik məqsədlərlə qəbul etmək olar. Bu bitki virusa yoluxma riskini azaltmaqla yanaşı, həm də onkoloji xəstəliklərlə yoluxmamaq üçün effektivdir".