Çin alimləri bildirir ki, dəmləndikdən 15 dəqiqə sonra qara çayda zərərli maddələr görünməyə başlayır.

Aztibb.az xəbər verir ki, alimlər çayın qaldıqca tərkibindəki zəhərli maddələrin artdığını deyib. Tanınmış qidalanma mütəxəssisi Yelena Solomatina köhnə çayın zərərlərini izah edib.

"Çay müxtəlif efir yağlarını ehtiva edir, üzərinə qaynar su tökdükdə, bu yağların bir hissəsi çay yarpaqlarından çıxır və nazik bir təbəqə şəklində suyun səthinə yayılır. Çay içərkən dərhal görə bilmərik, stəkan boşaldıqca qabın divarlarında qara ləkə nəzərə çarpır. Bu təbəqəyə orqanik birləşmələr, taninlər və s. daxildir. Hava ilə təmasda olanda bu maddələr oksidləşir, stəkanda patogen mikroflora yaranmağa başlayır. Xüsusilə çayı şəkərlə içsəniz, mikrobların yaranması üçün lazım olan isti, nəmli və şirin qida mühiti meydana gəlir" , - deyə mütəxəssis açıqlamasında qeyd edib.

Yelena Solomatinanın sözlərinə görə, bu zaman orada göbələk inkişaf etməyə başlayır və bədənə daxil olaraq onu mikotoksinlərlə zəhərləyir. Üstəlik, dünənki çay yarpaqlarına təzə qaynar su tökülərsə belə zəhərli maddələrin mənfi təsiri itmir. Yenidən mikotoksinlər bədənimizə daxil olur.

"Əlbəttə ki, çay yarpaqlarından zəhərlənməyəcəksiniz. Ancaq bədənimiz bu patogen mikrofloraya qarşı mübarizəyə başlayacaq, enerjisini və ehtiyatlarını ona xərcləyəcək. Nəticədə müqavimət sistemi zəifləyir. Oksidləşmə məhsulları ilə qarşılıqlı təsir nəticəsində, allergiya və bağırsaqların pozulması baş verə bilər. Qan dövranı bədən boyunca mikroorqanizmlərin ifraz etdiyi toksinləri gəzdirdiyindən, qaraciyərə əhəmiyyətli zərbə vurulur. Ürək də təsirlənə bilər. Ancaq bu dərhal baş vermir, lakin bir müddət sonra təsir göstərir".