"Aclıq adətən azkalorili pəhriz zamanı baş verir. Orqanizm piydən əlavə, əzələ də itirir. Daha sonra orqanizm metabolizmi minimuma endirir, arıqlama dayanır. Bundan əlavə, çox aclıq ilə müşahidə olunan pəhrizlər zamanı qrelin və leptin hormonlarının işi pozulur, pəhrizdən sonra iştaha nəzarət çətinləşir".

Aztibb.az xəbər verir ki, bu sözləri dietoloq Nərgiz Nəzirova deyib. Mütəxəssis bildirib ki, vitamin, amin turşuları, mikroelementlərin çatışmazlığı dırnaq, saç qırılmasına və qırışlara səbəb olur.

"Altıdan sonra yeməmək və yuxudan öncə aclıq ilə mübarizə etmək sizi kontrolsuz iştaha gətirəcək. Çalışın yuxudan 3 saat öncə yeyəsiniz. Bir çoxları aclıqla iştahı səhv salır, hesab edirlər ki, pəhriz zamanı aclıq normaldır. Amma aclıq yalnız maddələr mübadiləsini ləngidir. Düzgün ərzaqları seçsəniz aclıq da olmayacaq", - deyə dietoloq əlavə edib.

Dietoloq aclıq hissinin yaranma səbəbləri arasında stressin də rolu olduğunu qeyd edib:

"Gün ərzində nə qədər yemək yesək də qısa bir müddət sonra təkrardan aclıq hiss ediriksə bunun altında yatan bəzi səbəblər var. Davamlı olaraq aclıq hiss etmənin səbəbi zamansız qidalanma və yanlış həyat tərzidir. Yetərli dərəcədə yağ qəbul etmiriksə bu, aclıq hissinin tez bir zamanda yüksəlməsinə gətirib çıxara bilər. Kifayət qədər yatmamaq da bu hissin gün ərzində bizimlə birlikdə olmasına gətirib çıxarır. Yüksək lifli qidaları qida rasiona əlavə etmək aclıq hissini unutdurmaqda əhəmiyyətli dərəcədə təsir göstərəcək. Aclıq hissini artıran bir digər amil də çox stressli olmaqdır".