Mingəçevir Şəhər Mərkəzi Xəstəxanasında ziqomatik sümük parçalarının açıq reduksiyası və osteosintezi əməliyyatı icra olunub.

Xəstəxanadan Aztibb.az-a verilən xəbərə görə, əməliyyat üz-çənə cərrahı Kamil Abdullayev tərəfindən icra olunub.

Tibb müəssisəsinə müraciət edən 36 yaşlı şəxsdə (qadın cinsli) üzün sağ yarısının deformasiyası, yuxarı dodağın və burun qanadının uyuşmaları, ağızın kənarında məhdudiyyətlər, yaralanma bölgəsində ağrı müşahidə olunub.

Kamil Abdullayevin verdiyi məlumata görə, pasiyentin əməliyyat zamanı sümükləri düzgün vəziyyətdə yerləşdirilib, sınıq zonasında olan üz skeletinin parçaları düzgün anatomik vəziyyətdə yerləşdirilib, ağızın açılması funksiyası tam bərpa edilib, infraorbital sinirin sıxılması da aradan qaldırılıb.

Pasiyent üzərində əməliyyat uğurla icra edilib. Ziqomatik sümüyün yerini dəyişdirdikdən sonra, sümük parçalarının bərpa edilmiş mövqeyini saxlamaq üçün titan miniplitələr və vintlər istifadə edilib.