"Mübarizədən qalib çıxmaq üçün vətəndaş məsuliyyətimizi dərk etməliyik" - Mərkəzi Gömrük Hospitalı
03.11.2020 15:43
"2020-ci il bütün dünya üçün mübarizə ili oldu. Amma Azərbaycan üçün bu il həm də tarixi qələbənin başlandığı, zəfər tariximizin yazıldığı ildir. Bu günlərdə Azərbaycan iki düşmənlə ön cəbhədə vuruşur". 
 
Aztibb.az xəbər verir ki, bu barədə Mərkəzi Gömrük Hospitalı məlumat paylaşıb.
 
Məlumatda qeyd edilib ki, virusa yoluxanların sayındakı artım məsuliyyəti dərk etməli olduğumuzu xatırladır:
 
"Öz şücaəti ilə qəhrəmanlıq tarixi yazan Azərbaycan Ordusu ön cəbdədə torpaqları işğaldan azad edərək, mənfur düşmən üzərində qələbə çalır, zəfər xəbərləri ilə xalqımızı sevindirir. Eyni zamanda bütün dünyada olduğu kimi ölkəmizdə də koronavirusla mübarizə istiqamətində gərgin əmək sərf olunur.
 
Son günlərdə bütün dünyanın bəlasına çevrilmiş bu “taclı” virusa yoluxanların sayındakı artım artıq hər birimizə bir daha vətəndaş məsuliyyətimizi dərk etməli olduğumuzu xatırladır. Cəbhədən gələn zəfər xəbərləri virusla mübarizədə ayıq-sayıq olmalı olduğumuzu unutdurmamalı, əksinə əsgərlərimizə dəstək olmaq üçün sosial məsafəni gözləməyi, tibbi maskalardan düzgün istifadə etməyi, maskanı taxmazdan öncə və çıxardıqdan sonra əllərimizi axar su altında yumağı və ya dezinfeksiya etməyi xatırlatmalıdır.
 
Bu adi tələbləri gündəlik davranışlara çevirərək biz əsgərlərimizlə yanaşı hərb meydanında əsgərlərimizə dəstək olan həkimlərimizə də kömək edə bilərik. Virusa yoluxmuş xəstə sayının artması həkimlərin onsuz da gərgin olan iş yükünün daha da artması deməkdir. Axı bu günlərdə həkimlər cəbhədə yaralanan igidlərimizə daha çox kömək etməli olurlar. Bu mübarizədə hər birimiz məsuliyyətimizi dərk etməli, birlik nümayiş etdirməli və cəbhədə olduğu kimi koronavirusla mübarizədə də qalib olmağı qarşımıza hədəf qoymalıyıq.
 
Beləliklə, hər iki cəbhədə qalib olaraq zəfər xəbərlərinin sevincini layiqi ilə yaşayarıq. Koronavirusla mübarizədən qalib çıxmaq üçün fərdi vətəndaş məsuliyyətimizi dərk edərək bütün tələblərə riayət etməyi unutmayaq! Biz birlikdə güclüyük! Biz hər iki cəbhədə qalib olacağıq! Biz zəfər çalacağıq! Qarabağ Azərbaycandır!", - məlumatda qeyd edilib.