Gecə 9-10 saat yatmaq piylənməyə səbəb olur və erkən ölüm riskini artırır.

Aztibb.az Medikforum.ru-ya istinadən xəbər verir ki, hər gecə 9-10 saat yatmaq, həyatı qısaldan, təhlükəli xəstəliklərin və sağlamlıq problemlərinin inkişafına səbəb olan obezliyin bir faktoru ola bilər.

Tədqiqatçılar, bu qədər yatan insanların gündə 7-8 saat yatanlara nisbətən kilolu və obez olma ehtimalının 21% daha yüksək olduğunu müəyyən edib və piylənmənin erkən ölüm riskini artırdığını qeyd ediblər.

“Artıq piy toxuması 2-ci tip diabet, döş və bağırsaq xərçəngi və insult kimi həyati təhlükəli patologiyaların inkişafına səbəb olan iltihablı proseslərin inkişafına kömək edir. Bu pozuntular insan ömrünü 3-10 il qısalda bilər”, - deyə, məlumatda bildirilib.

Başqa bir araşdırma nəticəsində isə məlum olub ki, hər gün 9 saatdan çox yatmaq qadınlarda ürək xəstəliklərinin meydana gəlməsinə səbəb olur.

"Gündə 9-11 saat yatmaq ürək-damar xəstəliyi ehtimalını 38% artırır. Bu xəstəlik aterosklerozun - qan damarlarının boşluqlarında xolesterol yığılması və divarlarının kalsifikasiyası (sərtliyi) ilə əlaqəli damar patologiyası fonunda inkişaf edir. Koroner arter xəstəliyi dünya miqyasında ölümün əsas səbəblərindən biridir", - deyə, qeyd edilib.