ABŞ-da aparılan araşdırmaya görə, yeni növ koronavirus (COVID-19) epidemiyasının başladığı mart ayında bu ölkədə sosial məsafədən istifadə qaydası bir həftə əvvəl tətbiq olunduğu təqdirdə Nyu-Yorkdakı xəstəlik sayının may ayının sonuna qədər 80 faiz azaldıla biləcəyi qənətinə gəlinib.

Aztibb.az medimagazin.com.tr-yə istinadla xəbər verir ki, Viskonsin Universiteti tərəfindən aparılan tədqiqata əsasən, bu halda may ayının sonunda yoluxma sayı 203 min 261 əvəzinə, 41 min 366 səviyyəsində qala bilərdi. Lakin sosial məsafə bir həftə sonra tətbiq olunsaydı bu rəqəm 7 dəfə artaraq 1,4 milyona çata bilərdi.

Tədqiqatın nəticələri epidemiyanın sürətlə yüksəldiyi dövrdə bəzi əyalətlərdə məktəblərin və müəssisələrin bağlanması, izdihamlı toplantılara icazə verilməməsi və evdə qalma kimi ciddi məhdudiyyətlərin müsbət nəticələr verdiyini göstərib.

Sosial məsafəyə necə əməl olunduğunu mobil telefon siqnalları vasitəsi ilə izlədiklərini bildirən araşdırma qrupu ABŞ-ın ən işlək şəhərlərindən biri olan Nyu-York və Viskonsin əyalətindəki daha az hərəkətli iki bölgəni müqayisə edərək COVID-19 tədbirlərinin onun yayılmasının qarşısını almağa təsiri barədə əhəmiyyətli nəticəyə gəldiklərini bildiriblər.